ni hao nomol... so, ich glaub ich schaffs doch no zumene letschtae massemail... i oepae 8 stund fluegt uesen flugi, da soett aso no langae... s letscht mol hani glaub vo xi'an gschribae, und dass i villicht nomol gang go roessli riitae, und stelled eu vor, da isch wuerkli de fall gsi, ganzi 4 taeg hani miis fuedlae strapaziert... aber s haet sich glohnt... uesi roessli haend ues bis uf 4000m ue treit, und da irgendwo in mittelchina, wunderschoeni landschaft, (usnahmswiis) mol kei auto (und nu ganz selte mol en toeff oder en traktor), vill tibetischi gebetsfahnae (es haet doet diversi minderheite, au uesi 3 guides sind tibeter gsi, und haend ues am lagerfuer tibetischi liedli vorgsungae (nochdem da mir ues mit "blos e chlini stadt" und "let it be" abgmueht haend)), 100% vegi aessae und ab und zue au mol no e fetti portion raegae... no chli meh g regnet haet s ei mol in guilin, da isch doet wo s en huufae karstberge het (ihr haend sicher mol es foeteli vo doet gseh, jenschti huebschi huegel wo sich im wasser spiegled, siehe au foeteli unnae). mir haend doet gfundae mir chlettered mol uf ein vo dene berge ue, und noch knapp ere stund, chum simmer dobae aacho, isch e mega gwitter cho, und mir sind triifend nass quer dur d touristross zrugggloffae, und nid wenig iiheimischi haend sich s lachae nid choenae vokneiffae... i dem kaff isch eh no recht luschtig gsi, am tag vorher isch s no vill meh abgangae: mir haend velo gmietet, we immer gseit mir bruched kan guide wo ues vor de nasae uamefahrt, und sind mol loszogae, ich mit minae neue badhosae und d melanie mir ihrae neuae wiisae leinaehosae. bald haemmer de pfuetzae nuemmae choene uuswichae, und d hosae sind langsam es bitzeli vospruetzt wordae... irgendwenn haet s denn mol es naetts bruegli geh, und ich ha denkt do mached mer doch mol wieder es schoens foeteli, und damits nid 0815-touri- perspektivae isch gangi chli i d hocki und - ritsch - en riss i de hosae (ich gang jetz do nid i d details...). da foeteli unnae isch uebrigens grad oepae noch dem zwueschedfall ufgnoh wodae... wie au immer, irgendwie isches denn wiiter gangae, aber nid allzu wiit, well ufzmol isch uesen weg dur en mittelgrossae see duraegangae. zum umchere haemmer ka luscht gha, also simmer halt meh als chnuetuef dur s wasser gwattet... und womer denn am andere endi wieder usaecho sind hani irgendwo her es "pfffff" ghoert, und prompt hani es loch im vorderpneu gha... da heisst ich ha s velo no chli wiitergstossae, bis dass mer uf es paar maenner (wo we immmer am chartae spiele gsi sind) gstossae sind. die haend denn gfundae "jo, da choemer scho flickae" und da isch denn au gangae, allerdings haet dodezue oepe s ganzi dorf moese mobilisiert werde, bis da alles werkzueg und flickzueg uftriebae gsi isch... aber s isch mega cool gsi we hilfsbereit die alli gsi sind! nochher isch s denn frohen mutes wiitergangae, s isch so es richtig geils schmals mountainbike-waegli cho, links en halbae meter wiiter unae einisch meh es schoens riisfeld, und d frog isch jetz wohl nu no wer vo ues zwei dass s vowuetscht haet, und usnahmswiis isch damol d meli di gluecklich gsi, und ihri wiisae hosae sind ufzmol nid nu bitzli sondern ganz bruu gsi... naja, das sind mol es paar episoedli gsi, di letschtae paar taeg haemmer do in shanghai vobrocht, zimli uusglaschtet mit foeteli entwicklae (so oepe jede morgae isch oeper vo ues zum fotiladae glofae, haet foeteli abgholt und anderi zum vogroessere brocht (und nebedbii no es paar croissants i de french bakery poschtet)), shopae (s git do ganz vill feini fruechteteemix mit ganze bluemli und was weiss ich alles dinnae) und natuerli fein aesse... ich freu mi zwor au wieder uf roesti und spaetzli, aber s essae do isch de hammer, vor allem die villae chlinae snacks wo s ueberall am strosserand git... ui, und huet isch s letschtmol chinesisch znachtesse aagseit... sniff! china isch wuerkli es spannends land zum reisae, s lauft alles recht guet, d luet sind fruendlich (bis uf gwuessi - aehm, ich weiss gar nid we me dene seit, die luet wo eim eifach di ganz ziit oepis woend vochaufae, und da toent do denn so: "hello, banana?" oder "watch? dvd? cheap, cheap...") und ebe, d natur isch zum teil eifach mega, so riisterasse im nebel oder au die vilae gaerte wo s i de grosse staedt git... die haend aber ein riisae hoggae, und zwor isches *strengstens* vobottae zum uf s gras z sitze (nid emol mit ere halbae fuedlibaggae), geschweige denn z liege... naja, uesen rekord isch immerhin bi knapp 5 minutae... so, ich glaub da langed fuer huet, ich mues mer jetz endli no go neui badhosae poschtae ;-) mached s alli guet und sind chli brav, damit s wetter i de schwiiz au no chli schoen isch wenn mir am sunntig zruggchoemed... bis bald (evtl gseht me sich jo am st. galler oder susch am fleischfescht bi de bambi oder am zuerisee (doet darf me immerhin uf d wiisae liege) oder was weiss ich...) marcel/chesi/cheese