sainbainuu und ni hao

ui, mir gheied grad schier d aerm ab vom rucksack traege und i dere hitz umaelaufe, und ich mag schier nid ae taste drucke - ich bruuch glaub dringend mol e chinesischi massage - aber ich probier trotzdem mol wieder es chliises allgemeins infomail...

es sind jo wieder einigi wuecheli vogangae... bim letschtae mail simmer jo in russland gsi, und jetz simmer scho 1.5 laender wiiter im suede, gnauer gseit in xi'an, so oepe i de mitti vo china, und choemed grad zrugg vomene touritrip zum 8. weltwunder, au bekannt als terracotta armee, oepe 500 plus minus 2000 johr alti lebensgrossi tonfigurae...

isch nid unspektakulaer, aber nued im vogliich zu de sandduene i de wueste gobi im suede vo de mongolei. mir haend total 2.5 wuchae i de mongolei vobroocht, es sympathisch s land, suuberer und weniger chaotisch als russland, mit mega schoene landschafte.

mir haend doet e 10 tages minibus tour imene alte aber superstabilewellvollmechanische buesli mit 2 franzose und eme englische paerli (und nid z vogaesse uesen emvodkanidwuerkliabgneigte fahrer sharaf) gmacht. So es paar highlights vo dem trip:
- die holprigste strosse vo miim laebe
- landschaftsfarbe vo gaell ueber roetlicht bis grue und blau
- ein vo de schoenste sunneufgaeng zmitzt i de sandduene
- en fette sandsturm ebefalls i dene duene
- x naecht i friedliche chline jurte, so rundi zelt mit 5-6 better (oder au nid), eme ofe (wo s zelt zunere sauna macht weme so we ich vorem is bett goh z vill holz driituet) und ere tuere wo fasch alli bis uf oeper woner villicht au kenned mindestens ei mol de chopf aagschlage haend. fertig. friedlich.
- enere druefache flussueberquerig mit bade und wieder usem canyon usechlettere, und aaschluessendem engelsmocke broetle
- jenschte feine znaecht mit garantiert jedesmol schoofsfleisch dinne, so dass sogar de chesi mit de ziit fasch gnueg devo gha het
- improvisierts volleyballspiele mit diversne chind ime jurtecamp
- ...und eme wasserfall, wo leider grad kei wasser zum falle gha het 

zrugg in ulaan baatar, de hauptstadt vo de mongolei haemmer ues daenn grad wieder chli a d zivilisation moesse gwoehne (au wenn glaub niemmer d vo ues enere warme duschi abgneigt gsi isch), aber nid fuer lang, well, nochdem dass mer in letschter sekunde no s billet fuer uf beijing organisiert haend, isches scho wieder wiiter gangae, nomol 2 naecht inen nationalpark i de noechi, damol inere jurte binere familie (mit flimmer-fernseh und gfruehrtrueh (milch isch aso gfruehrbar)), und doet isch de chesi s ersch mol ufeme ross (doer villicht roessli, die tier sind i de mongolei nid so gross) gritte. isch gar nid so uebel, villicht gits do in china nomol so e session...

hmm, und da isch s denn au scho oepe gsi mit dem grosse, schoene und fasch nid besiedlete land, und de zug haet ues eimol meh ganz friedlich as noegschte ziil brocht. z beijing am (einte vo dene oepe 5) bahnhof simmer z ersch chli ab dene viele luet voschrocke, aber womer usecho sind und die gruemige strosse mit vill grue und ganz vill velos und eignem velostreife gseh haend, haemmer so richtig freud gha.

beijing isch echt eini vo de interessanteste und gmuetlichste staedt woni jeh gseh han. nid nu die viele velofahrer, wo voll easy am umaecruise sind und sehr oft es liedli debii singed (so dass sogar d meli und de chesi mol es "bloss e chlini stadt" haend moese (oder besser probiert hend) singe), sondern au die aeltere luet wo am morge frueh im park taichi uebed oder mit luschtige farbige chraft- und fitnessmaschine umespieled sind mer sehr sympathisch. 

und d stadt selber isch riisig (so vom zentrum bis an einte stadtrand (wohrschindli oepe de noegscht) oepe 1.5 stund mit em velo), aber trotzdem nid chaotisch. s einzig schaade isch dass me die viele gruene wiise wo s haet nid darf betrette, geschweige denn driiliggae, und dass es schwierig isch es schwuembad z finde... aber die chliine nochteil sind nued im vogliicht zum esse wo s i dere stadt git... mmmmmmmmh! und ersch no mega billig, so fuer ein riisae znacht (so dass sogar ich amigs no oepis stoh loh
han) haemmer z vierte amigs so 120 yen, das sind oepe 4-5 stutz pro person ( mit bier) zahlt...

und s git nid nu peking ente (mir haend die bi ues selber toerfe i so oepis aehnlichs we crepes iiwickle), sondern au schlange, skorpion und was weiss ich fuer innereie. da haemmer natuerli nid gaesse, aber eimol hani fisch sweet and sour bstellt, und wasi uebercho han isch en riisae fisch gsi, oepe 10 cm durchmesser, und so halbe stehend knapp 20 cm hoch...

ui, ich chum grad selber wieder hunger ueber... aber z ersch muesi no schnell vonere muur vozelle, enere zimli grosse sogar... die muur isch nid nu gross, sondern zum teil au butze steil, so dass me mit rucksack zimli is schwittze chunnt. mir haend zaeme mit dene 2 franzose, wo i de gobi scho debii gsi sind, vo beijing uus en 2 tagesuusflug uf huahong gmacht, zumene stueckli wo die muur no wild und bis jetzt no zimli untouristisch isch. irgendwo ufeme halbzerfallne wachturm haemmer daenn ueses nachtlager ufgschlage, em sunneundergang zueglueged, und gwarte bis dass de vollmond ufgoht... meh muesi glaub nid saege...

huet nacht goht s wieder wiiter, no chli meh in weste, und hoffentli mol wieder chli a di frisch luft (do in xian isch s grad zimli smogig) und i d berge. villicht gits i knapp 4 wuche nomol es mail, und susch gseht me sich moeglicherwiis am st. galler bim rem konzert...

mached s guet und gnuessed de summer
marcel/chesi/cheese