alli wo ghofft hend ich hegi gnueg vom stuss schriibae moni leider enttueschae, es goht wiiter... d'periode werded vomuetlich je laenger je laenger, nichtsdestotrotz gits do mol wieder es paar news uus schottland... die news werded we immer begleitet vomenae photiupdate uf www.dreamweb.ch/cheese...

au wenn jetz scho en drittel vo minae 12 wuchae studium (exkl. feriae) do umae sind, so wuerkli stressig ischs immer nonid... di einzige ufzgi woni bis jetz gha ha isch im fach german translation, woni pro wuchae en text darf i enlisch uebersetzae... das heisst ich ha immer no vill ziit zum chli es nachtlebae gnuessae...

so oepae jedi nation wo do votretae isch het ihri society, segs hispanic, german, oder i dem fall french... die organisiered denn amel so parties, mached fliisig werbig mit free crepes and free wine, und sind denn ueberrascht wenn oepae 50 anstatt we erwartet 15 luet uf die crepes warted. so het denn nid jedae e franzoesischi omelette uebercho, aber defuer hets gnueg wii gha. es paar amirkanerinnae hend denn mol gfundae si goenged jetz wiiter, i de stadt seg no en ceilidh (sprich: keili, da isch de schottisch volkstanz, so chli a la braveheart). zaemae mit eme franzos hani denn gfundae dass me da au mol soett uusteschtae, und es halb stund spoeter simmer zu schottischer musik im kreis umaeghuepft. da isch unglaublich aastrengend, macht aber voll spass...

nebst de societies gits do au en cinema club, wo pro wuchae oepae 4 film imenae grossae vorlesigssaal zeiged. fuer 2 pfund = 5 stutz chunnt me doet inae, und well ich do kan fernseh ha isch da no e praktischi sach... jo, und letscht mittwuch haets mi sogar mol is theater voschlagae... e erklaerig wie da passiert isch lieferet villicht de titel: the vagina monologue. und de titel isch programm gsi... aber im ernst, isch wuerkli mega luschtig und zum teil au zimli ernst und tuefgruendig gsi. aber loemmer da thema...

amadeus isch angeblich di groesst disco vo schottland... wells am maentig en gratis bus doet anae und gratis iitritt (inkl. gratis lolipop) git, han ich mir da mol aatue... well, d'disco an sich isch no stylish gsi, mit oepae 4 voschiedenae bars und sich bewegende lampe a de decki, aber d'musig isch oepis vom uebelschte woni je ghoert ha, und au wenn d'drinks bis am 12i nu 1 pfund koschted hend bini i nonid gnueg bsoffae gi zum sachae we a-team soundtrack und no limit (vo 2 unlimited, so oepae 12 johr alts techno-liedli) uuszhaltae... im priory, da isch e disco wo inerae ehemaligae chilae beheimated isch, no speziell, gwuessi religioeseri luet findeds aber nid so cool, isch entweder d'musig besser gsi oder ich chli weniger nuechtern, uf jedaefall isch es doet no cool gsi und me het zimli choenae abdancae...

(da isch ka disco, sondern ich vozell eu do mol chli mit was fuer luet ich mich do so umaetriib...) nebst de karin us schwedae, wo - we sicher jedi maennlich person wo es letschti mail glaesae haet usaegfundae haet (oder wieso sind d'anzahl zuegriff i de statistik vo de page vo allnae foeteli wo karin drufstoht doppelt so gross we bi de reschtlichae foeteli?) - nid blond isch, gits do no de james, flatmate vo de karin, en schott us glasgow, zimli cool, und er het e auto..., de pedro, aen zimli luschtigae spanier wo mit mir studiert und sich zum teil herzhaft ueber de akzent vo gwuessae profesorae ufregt, de uwe, friedlichae typ vo freiburg i br, studiert ebefalls computing science, isch aber seltae umae, well er di ganz ziit flatparties mit sinae easy flatmates het, sowie en huufae anderi luet woni aber nid wuerkli guet kenn und zum teil au de namae scho lang wider vogaessae han...

hillhead, de huegel wo mini unterkunft druf isch, isch oepae 10 rennminutae vom strand entfernt, was dezue fuehrt dass sich mini fuess ab und zue i mini turnschueh voirred und mich doet anae joggae loend. es isch mega schoen doet, de strand isch meistens menschaeleer, es het wellae uf de rechtae siitae und en gmuetlichae golfkurs links... geschter haemmer en spaziergang zum luechtturm gmacht; we me au uf de foeteli gseht isch es doet so richtig cliffig und waellig (uf jedaefall isch de pedro mit nassae schueh heigloffae...) und wunderschoen...

ok, ich glaub das langed mol wieder vorrig, gratulation a alli wo's bis do anae gschafft hend, und a derae stell au mol no merci a alli wo mol zrugg gschribae hend, es git also wuerkli es paar wo sich duraekaempft hend... ich wuensch eu allnae e gueti ziit, saeged im schnee en gruess und hebed eu sorg...